「第一代旅遊KOL」

[mtr]

https://www.threads.com/@mediaah4/post/Dah7D6IEz1l

隨筆 | 朱維德

見到朱維德離世嘅消息時，心諗：會唔會有低劣嘅垃圾傳媒以「第一代旅遊KOL」形容朱翁？果然不出所料，一望就見到TOPIG。人走咗就唔好拎呢三個英文字母侮辱人。

家父晚年經常參加由人稱「朱翁」嘅朱維德親自帶隊出發嘅旅行團四圍旅遊。返到嚟每次都讚不絕口，特別係朱維德風趣幽默外，更做足功課，對景點歷史同文化瞭如指掌，如數家珍作詳盡介紹。連家父旅居同工作過嘅地方發生過嘅嘢都準確介紹外，甚至仲有好多鮮有聽聞嘅事情。

用KOL形容朱維德係侮辱。現今KOL水準參差，大部分都屬唔合格水平，來來去去幾個形容詞「勁XX，份量多」一坐低就好似四十年無食過嘢咁瘋狂將食物放入口，邊講邊食邊噴，嘴內同嘴角仲有食物殘渣之際繼續話你知佢係「食到好飽」嘅豬隻。食咗乜，用咩調味，咩食材，製作過程花咗咩心思都懶得考量，連跟住食肆嘅marketing稿照讀到甩甩咳咳甚至懶得讀。

更過份係部分「垃圾級」KOL連歷史都老作，廣島原爆喺邊度亂噏一通，「創作力量同幻想，會嚇你一跳」。

無辦法，被對文化歷史素有研究，主持經驗豐富同極具幽默感嘅朱維德主持嘅旅遊節目寵壞咗，係會㗦嘈啲。

但麻煩，尊重下老人家。

[joe]