其實個熱帶氣旋成型有編號， 都已經係一個已知風險， 重點係幾時拎出來拗
1. 買旅遊保或家居保，唔可以掛咗波先買，呢啲叫做「已知悉情況」（pre-existing condition），就算你買咗、個風球點樣影響到你個行程或屋企，想獲得賠償係嘥氣。
2. 不過，有讀者報料，原來「已知悉情況」個definition可以「飄移」嘅。（見圖）
3. 喺七月颱風韋帕襲時，某保險公司內部講明，話「熱帶氣旋警告前嘅投保會生效」，但如果掛波之後買就係「已知悉情況」，不能獲得賠償。呢個都好清晰嘅。
4. 咁今次樺加沙，係咪都係掛波前買保險就有得保？嗰間保險公司今次內部條線就係「9月20日下午4點或之前」買先有得保。
5. 喂，但一號波係9月22嘅下午12時20分發出喎。亦即係未掛波前嗰兩日買咗保險，已經跌入「已知悉情況」，圍骰通殺。
6. 呢個都係典型搬龍門，因為投保人買嘅時候，從來唔知道有呢條內部指引變動，甚至連個代理都係事後先知，從而做錯決定。
7. 我認為保險公司條線定咗喺一個位，呢個就成為咗慣例，每次都郁而又冇通知，就會令人無所適從，跩死啲客人。
