發表人 lau_kelvin 發表於 2008-04-22, 16:24
sorry,小弟個題目慘被一位無聊朋友入侵!我已經打0左佢一身!
套戲係講一個11歲,晌孤兒院長大(August),佢係被佢爺爺專登送佢孤兒院,事關呢位爺爺個女,亦即係呢位細路仔個親生亞媽,晌某一晚表演完佢大提琴演出後,邂逅佢一見鐘情0既搖滾樂歌手,並即晚情不自禁同佢攪埋,事後因為條女要去第二度進修音樂,個男仔就再冇機會同佢見面,點知就係攪完果晚就有0左。激到條女個老豆死下死下。
由於有頭有面,個老豆就趁個女就來生得之前某一晚意外地被車撞暈入院後,順勢話比佢聽個BB冇0左,但係其實就送0左個BB去孤兒院,諗住冇眼屎乾淨盲。
就係因為咁,可憐0既August就晌孤兒院,過0被人取笑、欺負0既11年。
好有音樂天份0既August一直深信自己父母,並非佢0的成日恰佢0既院童咁講已經死哂。某日,佢隻身出去紐約,諗住搵果位約好社會褔利官,叫佢再次幫手搵返佢親生父母,點知跌0左張聯絡紙同埋蕩失埋路。
週圍行來行去之下,撞到一個晌街頭賣唱0既小黑童,由於佢冇人冇物,就跟住個黑童返去佢竇口,認識0左呢班靠賣唱維生細路0既阿頭巫師(羅拔威廉斯),呢個從未接觸過任何樂器0既細路,晌當晚晌未有任何人教導之下,竟然玩個電子結他玩到出神入化。巫師見到侗咁叻仔,梗係帶佢出去搵食。
有一晚,巫師個竇被人報寸話佢非法窩藏細路仔,0的差佬去捉人,August梗係即刻逃走喇!走下走下,就走0左去有好美妙歌聲傳出來0既黑人教堂裡面,呢埋過0左一晚。
機緣巧合下,August超級勁0既音樂天份被教堂神父發現,於是送0左佢去當地最出名音樂學院讀音樂。
August超音音樂天賦晌音樂學院裡面更加表露無遺,11歲竟然晌上堂時就寫0左一首交晌樂狂想曲。
同時間,August個爺爺因為就來瓜得,於是就話返比佢個女,即係August個媽媽聽,佢個仔係未死0既。August媽媽梗係即刻發哂茅咁週圍去搵返個仔喇!
講返August果邊,院長見佢咁勁,亦都幫佢安排晌國家公院公開演出,August亦希望藉住呢次演出,會被佢親生父母聽到而可以團聚。
最後,究竟August會唔會同佢父母重逢團聚呢?咁大家就自己去睇喇!
多謝觀看。
玩AV又好,玩Hi-Fi又好,貴有貴玩,平有平玩。不過千祈咪被佢地玩!